کوئٹہ (این این آئی)صوبہ بلوچستان میں بارش برسانے والا مغربی سسٹم داخل ہو چکا ہے جس کے تحت بلوچستان کے شمال مشرقی علاقوں میں بارش متوقع ہے۔صوبائی ڈیزاسٹر مینجمنٹ اتھارٹی (پی ڈی ایم اے) کے مطابق بارش برسانے والے مغربی سسٹم کے تحت کوئٹہ، خاران، چمن، زیارت، قلعہ عبداللّٰہ، قلعہ سیف اللّٰہ، لورالائی، پشین، زیارت، ہرنائی اور مسلم باغ میں بارش کا امکان ہے۔
بلوچستان کے علاقے ڑوب، موسیٰ خیل، سبی، مستونگ، قلات، نوشکی اور چاغی میں بھی بارش ہو سکتی ہے۔محکمہ موسمیات کے مطابق خیبر پختون خوا کے دارالخلافہ پشاور میں مطلع جزوی ابر آلود، موسم خشک اور سرد رہنے کا امکان ہے۔پشاور میں کم سے کم درجہ حرارت 13 ڈگری سینٹی ریکارڈ ہوا جبکہ زیادہ سے زیادہ 29 ڈگری سینٹی گریڈ تک بڑھنے کا امکان ہے۔پشاور کی ہوا میں نمی کا تناسب 89 فیصد تک ریکارڈ ہوا ہے۔محکمہ موسمیات کے مطابق خیبر پختون خوا میں سب سے کم درجہ حرارت کالام میں صفر ڈگری سینٹی گریڈ ریکارڈ کیا گیا ہے۔